ટ્વિટર પર શું કરવું, શું ન કરવું: પંદર મુદ્દાનો કાર્યક્રમ: સૌરભ શાહ

(તડકભડક : ‘સંદેશ’, ‘સંસ્કાર’ પૂર્તિ)

સોશિયલ મીડિયા એક અનિવાર્ય દૂષણ છે. દૂષણ એટલા માટે કે એનો બેફામ દુરુપયોગ થાય છે અને અનિવાર્ય એટલા માટે કે સોશિયલ મીડિયા વગર મોટા ભાગના લોકોને ચાલવાનું નથી. ફેસબુક પર તમે હો તો શું કરવું અને શું ન કરવું એ વિશેની ટિપ્સ મેં એકાદ દસકા પહેલાં આપી હતી. આજકાલ ટ્વિટર વધારે ચલણમાં છે. આજે એના ઉપયોગ વિશેની કેટલીક ટિપ્સ.

૧. બધાં ઈંડાં એક ટોકરીમાં ન મુકાય. તમારું તમામ કામકાજ માત્ર ટ્વિટર પર થતું રહેશે તો આખો દહાડો તમે ત્યાં જ ચોંટેલા રહેશો. કલાકોના કલાકો બરબાદ થતા રહેશે. લોકો સાથે સંપર્ક રાખવાથી માંડીને અત્યારે જગતમાં શું શું બની રહ્યું છે ત્યાં સુધીની ડઝનેક જરૂરિયાતો તમારી હોવાની. આ બધું જ તમને ટ્વિટર આપશે એવું માનીને ચાલશો તો તમારી દુનિયા સાંકડી થતી જશે. ટ્વિટર પર જે થાય છે તે સિવાય જગતમાં બીજી કોઈ પ્રવૃત્તિ થતી નથી એવું તમે માની બેસશો અને તમારું વ્યક્તિત્વ સંકોચાતું જશે. તમારી માહિતીના સોર્સ એક કરતાં વધારે હોવા જોઈએ. ન્યૂઝવ્યૂઝ, મનોરંજન તેમજ બીજાઓ સાથેના સંપર્કના સોર્સ પણ એક કરતાં વધારે હોવા જોઈએ. ૠષિઓ ટ્વિટર નહોતા વાપરતા પણ આ નો ભદ્રાઃ ક્રતવો યન્તુવાળા સુપ્રસિદ્ધ મંત્રમાં લખી ગયા કે અમારા માટે બધી બાજુએથી (દસે દિશાઓથી) વિચારો આવતા રહે. ટ્વિટર આ દસમાંની માત્ર એક દિશા છે.

૨. ટ્વિટર પર તમને રાજા ભોજ પણ મળશે અને ગંગુ તેલી પણ. સોશિયલ મીડિયાની આ ખૂબી છે અને ખામી પણ. છત્તીસગઢમાં દેશદ્રોહી નક્સલવાદીઓ ભારતના બાવીસ જવાનોને શહીદ કરે છે એ વિશે સરકારે શું કરવું જોઈએ અને શું નહીં એ વિશે સલાહ આપનારા સેંકડો લોકો મળી આવશે. આમાંનો એક પણ જણ એવો નથી હોતો જેની પાસે આ ઈશ્યૂને વિગતે સમજીને યોગ્ય પગલાં લેવા જેટલી અક્કલ અને એટલો અનુભવ હોય. આવી બાબતમાં સરકાર પાસે વિશાળ મશિનરી હોય છે, વિવિધ સ્તરના અનેક નિષ્ણાતો હોય છે જેમના અનુભવનું વજન માપીને સરકાર સ્ટ્રેટેજી નક્કી કરતી હોય છે. આ કે આવા અનેક સમાચારોની બાબતમાં ટ્વિટર પર થતા લોહીઉકાળાને વાંચીને, લાઈક કરીને, રિટ્વીટ કરીને કે એના પર કમેન્ટ કરીને તમે માત્ર તમારો ટાઈમ વેસ્ટ કરતા હો છો. એક કહેવત કદાચ તમે સાંભળી હશે: કાજી દુબલે ક્યોં? સારે ગાંવ કી ટ્વિટર.

૩. ટ્વિટર પર જે કંઈ વાંચવા મળે તે કોણે લખ્યું છે તેની તપાસ કરો. એ મોટી નોટ છે કે ખોટી નોટ છે એ તો તપાસો પહેલાં. આ હેન્ડલ પેરડી અકાઉન્ટ કે ફૅનક્લબનું નથી એ પણ તપાસો. અભિપ્રાય આપવાની એની લાયકાત કેટલી છે તે જાણવાની કોશિશ કરો. ખરેખર કોઈ અધિકારી વ્યક્તિ હોય તો એનો વિરોધ કરવો હોય તો ભલે કરો પણ એ વિરોધ કરવામાં વિવેક રાખો. મને અહીં વળી કોણ ઓળખવાનું છે એવું માનીને ગમે તેવી ભાષા વાપરશો તો તમે તમારી જાત આગળ પણ ખુલ્લા પડી જશો. ટ્વિટર પર વિરોધ કરવામાં અને ભાષાની મવાલીગીરી કરવામાં આસમાન-જમીનનો તફાવત છે. કોઈ બિનઅધિકારી વ્યક્તિનો વિરોધ કરવાનું મન થાય તો એ ચળ દબાવી રાખવી. જેનું કોઈ વજૂદ જ નથી એવી વ્યક્તિ સાથે શા માટે જીભાજોડી કરવી?

૪. તમે જો પાંચમાં પુછાતા હો, સમાજમાં તમારી ઊઠબેસ આદરણીય ગણાતા વર્ગમાં થતી હોય, તમે તમારા કામને લીધે પ્રસિદ્ધ હો, તમને લોકો સિલેબ્રિટી ગણતા હોય તો તમારા ટ્વીટનો, તમારા વિચારોનો વિરોધ કરનારાઓ કે તમને ટ્રોલ કરનારાઓને જવાબ આપવા દોડી જવાની જરૂર નથી. હાથી ટ્વીટ કરે ત્યારે શ્વાનો ટ્રોલ કરવાના જ. આ પબ્લિક પ્લેટફોર્મ છે. કોઈપણ વ્યક્તિ કંઈ પણ લખશે-તમારે સહન કરવાનું અને શ્રેષ્ઠ તો એ છે કે એવા લોકો પર ધ્યાન જ નહીં આપવાનું. એમના ટ્રોલિંગને ઈગ્નોર કરવાનું. એમને બ્લૉક કરીને એમની મહત્તા વધારવાની કોઈ જરૂર નથી, સિવાય કે કોઈએ પોતાની તમામ લિમિટ્સ વટાવી દીધી હોય. બાકી તો ગામ હોય ત્યાં ઉકરડો પણ હોવાનો. આવા શાહીનબાગીઓને બ્લૉક કરીને શહીદ કરવાની જરૂર નથી. તેઓ સ્ક્રીનશોટ લઈને ગામમાં ઢંઢેરો પીટશે કે જુઓ, આ સિલેબ્રિટીએ મને … પર લાત મારીને કાઢી મૂક્યો. આવા ઉકરડાઓને તમે મોઢે લાગશો તો ગંદકી તમારા પર ચોંટશે. દૂર રહો અસભ્ય અને અસંસ્કારી ટીકાકારોની સાથે દલીલબાજી કરવાથી.

૫. વારતહેવારે ચેક કરતા રહો તમે જેમને ફૉલો કરી રહ્યા છો એ લિસ્ટને. એમાંના કેટલાક અત્યારે તમને અપ્રસ્તુત લાગે તો તરત એમને અનફૉલો કરી દો. અન્યથા તમારી ટાઈમલાઈન (ટી.એલ.) પર એમનાં ટ્વીટ દેખાતાં રહેશે અને તમારું મગજ ખરાબ કરતા રહેશે. અનફૉલો કર્યા પછી તાજી હવા લાવવા માટે કેટલાંક નવાં હેન્ડલ ઉમેરવાં હોય તો ઉમેરી દો જેથી નવી નવી માહિતી, નવા નવા દૃષ્ટિકોણ પ્રાપ્ત થતાં રહે. કોઈને ફૉલો કર્યા પછી અનફૉલો કરશો તો માઠું લાગશે એવો વિચાર આવે તો મ્યુટ કરી દેવાના. આ ઉપરાંત કોઈને ખબર ન પડે એ રાતે તમે એને બ્લૉક કરી શકો છો. ટ્રિક જાણીતી છે. કોઈને પૂછી લેજો! ટૂંકમાં, જેલની ભાષામાં છોટી સફાઈ અને બડી સફાઈ કરતા રહેવાનું. (છૂપી સફાઈ પણ થઈ શકે!)

૬. પળેપળના સમાચાર મેળવવા માટે ટ્વિટર શ્રેષ્ઠ માધ્યમ છે એવું તમે માનતા હો તો તમે સાચા છો. પણ પહેલાં એ વાત તો નક્કી કરો કે શું તમને પળેપળના સમાચાર મળતા રહે એ જરૂરી છે? સચીન વાઝે પાસેથી સાત મોંઘી ગાડીઓ મળી આવ્યા પછી આઠમી ગાડી અને એક લકઝરી બાઈક પણ મળ્યાં એ સમાચાર તમને બપોરે ટ્વિટર પર મળે કે રાત્રે ટીવીના ન્યૂઝમાં મળે તેથી તમારા જીવનમાં કે કામકાજમાં શું મોટો ફરક આવી જવાનો છે? મુખ્તાર અન્સારીને પંજાબથી યુપી લઈ જતો પોલીસ કાફલો અત્યારે ક્યાં પહોંચ્યો તેની મિનિટે મિનિટની ખબર રાખીને તમે શું મેળવી લેશો. તમે પોતે ન્યૂઝ પેપર કે ટીવીની ન્યૂઝ ચેનલ કે ડિજિટલ મીડિયાના ન્યૂઝ પોર્ટલ સાથે સંકળાયેલા હો તો અલગ વાત છે. બાકી મનોરંજન કે ચીપ થ્રિલ મેળવવામાં તમારો ટાઈમ, તમારી એનર્જી બરબાદ થવાનાં છે.

૭. ટ્વિટર પર જે કંઈ ગમ્યું તે બધું જ લાઈક કરી દેવાની કે વધારે ગમ્યું તે બધું રિટ્વીટ કરી દેવાની જરૂર નથી. તમારા જે ફૉલોઅર્સ છે એમની ટી.એલ.માં આ લાઈક્સ અને રિટ્વીટ દેખાયા કરવાની છે. એ લોકો તમારી લાઈક્સ રિટ્વીટથી ત્રાસી ન જાય એ જોવાની જવાબદારી તમારી.

૮. રિયલ વર્લ્ડમાં તમારું કામ કેટલું મોટું છે એનાથી તમારી મહત્તા વધતી હોય છે. બોલબચ્ચન થઈને તમે ટ્વિટર પર તમારા ફૉલોઅર્સ વધારી દીધા અને તમે તમારી જાતને સિલેબ્રિટી માનવા માંડયા તો એ ચાર દિન કી ચાંદની જેવો સંતોષ હશે. વર્ચ્યુઅલ વર્લ્ડમાં તમારી બોલબોલા થતી હોય તો એ ત્યારે જ ટકશે જ્યારે રિયલ વર્લ્ડમાં પણ તમારું એ કક્ષાનું કામ બોલતું હોય. બેફામ લખનારાઓને કે વ્યંગ-કટાક્ષ કરીને વાહવાહ બટોરનારાઓને રાતોરાત હજારો ફૉલોઅર્સ મળી જતા હોય છે. તમારે એ ટ્રેપમાં ફસાવાની જરૂર નથી. તમારી પાસે તમારું ભણવાનું છે, તમારી કારકિર્દી છે, તમારો ઘરસંસાર છે જેના પર વધારે ધ્યાન આપશો તો માત્ર તમારું જ નહીં, તમારી આસપાસનાઓનું પણ તમે ભલું કરી શકશો. પબજી રમવામાં તમે એક્‌સપર્ટ હો તો એનો અર્થ એ નથી કે તમે મોદીને સર્જીકલ સ્ટ્રાઈક કેવી રીતે કરવી એવું ટ્વીટ કરશો તો ઈન્ટેલિજન્ટ દેખાશો.

૯. તમે શું ખાધું, ક્યાં ફરવા ગયા અને કયું નવું કપડું પહેર્યું કે તમારા ઘરમાં કોણે શું કર્યું એવી માહિતી ફૅમિલીના વૉટ્સએપ ગ્રુપ પૂરતી જ સીમિત રાખવી. એને ટ્વિટર પર તરતી મૂકવાના જમાના ગયા. એ બધું હવે આઉટડેટેડ થઈ ગયું, સિવાય કે એ માહિતી જનરલ પબ્લિકને ઉપયોગી થવાની હોય. બાકી, બાથરૂમના બારી-દરવાજા ઉઘાડા રાખીને નહાતા હો એવું લાગશે. બીજી એક વાત, પીએમ કે એચએમ જેવા મોટા માણસોને આપણાથી ટેગ ના થાય એટલું સમજો, બાળકો. અને એકસાથે ડઝનબંધ ટેગ્સ તથા હેશ ટેગ્સવાળું તમારું ટ્વીટ વાંચવા આ દુનિયામાં કોઈ નવરું નથી.

૧૦. ટિવટરનો સૌથી મોટો ફાયદો એનું લાઘવ છે. ૨૮૦ કેરેક્ટર્સમાં અંગ્રેજી કે ગુજરાતી કે બીજી ભાષાઓના લગભગ પચાસ જેટલા શબ્દો સમાય. વધુમાં વધુ પાંચ-સાત વાક્યોમાં જ તમારે જે કહેવાનું હોય તે કહી દેવું પડે. (ક્યારેક મુદ્દો સવિસ્તર સમજાવવો હોય અને એક કરતાં વધારે ટ્વીટનો થ્રેડ બનાવો તે જુદી વાત છે પણ એવું ક્યારેક જ કરવાનું હોય.) લાંબી લાંબી વાતોની પળોજણમાં આમેય કોઈને રસ નથી હોતો. સ્કૂલમાં પ્રેસી કે વિચારસંક્ષેપ કરવાનું શીખવવામાં આવતું. મિતાહારની જેમ મિતભાષી હોવું પણ જરૂરી છે. ઓછા આહારની જેમ બોલવા-લખવામાં પણ ધ્યાન રાખવું. મુદ્દાસર, આડીતેડી વાતો કર્યા વિના, મૂળ વાતને વળગી રહીને લખવું કપરું છે પણ અનિવાર્ય છે એ તમને ટ્વિટર શીખવાડે છે. શીખી લેવું. એક જમાનામાં તાર કે ટેલિગ્રામમાં ચાર જ શબ્દો લખતા અને વાતની ગંભીરતા સમજાઈ જતી: મધર સિરિયસ, કમ સુન. ટ્વિટર આવું જ માધ્યમ છે.

૧૧. તમારા જૂના ટ્વીટ્સ તમારી ખિલાફ વપરાઈ શકે છે. ટ્વિટરની બે કોન્ટ્રાડિક્ટરી બાજુઓ છે. એમાંની એક દેહરૂપે નશ્વર છે.  તમારા ટ્વીટને તમે ગમે ત્યારે આસાનીથી ડીલીટ કરીને ભૂંસી શકો છો. આની સામે તમારી ટ્વીટ તમારા દુશ્મનોએ લીધેલા સ્ક્રીનશૉટરૂપે અમર છે જેને ડીલીટ થયા પછી પણ કોઈ હણી શકતું નથી, બાળી શકતું નથી, ભિંજવી શકતું નથી. તમારા વિચારો સમય જતાં બદલાય એમાં કશો વાંધો નથી પણ ઘણીવાર કોઈ ડેવલપિંગ ન્યુઝ કે ગરમાગરમ ચર્ચામાં આગળ પાછળનું જોયા વિના કે વગર વિચાર્યે કૂદી પડતાં પહેલાં આ વાત યાદ રાખવી. ભવિષ્યમાં મિસક્વોટ થશો ત્યારે તમારા ફૉલોઅર્સમાંથી કોઈ તમને બચાવવા આવવાનું નથી.

૧૨. જેની કોઈ કરતાં કોઈ પબ્લિક ઇમેજ નથી, કોઈ અકાઉન્ટેબિલિટી નથી, ઘણી વખત તો અસલી પહચાન પણ નથી એવા હેન્ડલના ટ્વિટની ઘોર ટીકા કરતી કમેન્ટ કરશો કે એની સાથે કુસ્તીમાં એન્ગેજ થશો તો અલ્ટિમેટલી ફાયદો એને જ થવાનો છે. એને નેગેટિવ પબ્લિસિટી મળવાની છે. આવી રાખી સાવંતોને મોઢે નહીં લાગવાનું.

૧૩. ‘બ્રેકિંગ ન્યુઝ’ લખીને જે ટ્વીટ મળે તે વાંચતાં પહેલાં વિચારો તો ખરા કે ખરેખર કોઈ અખબાર,  ન્યુઝ ચેનલ કે જાણીતા પત્રકાર કે જવાબદાર વ્યક્તિએ આ સમાચાર મોકલ્યા છે કે પછી કોઈ લલ્લુપંજુએ. કોઈપણ નેગેટિવ સમાચારને ટ્વીટ કરતાં પહેલાં બે વાર વિચારો.

૧૪. નાનપણથી તમારા પેરન્ટ્સે તમને શીખવ્યું છે કે સભ્યતાથી બોલવું. મા-બહેનની ગાળો જૂના અને અંગત યારદોસ્તોની સંગતમાં બોલવી હોય તો બોલો પણ ગામ આખું સાંભળતું  હોય એ રીતે બોલશો તો તમારા જ ભદ્ર સંસ્કારો પર પ્રહાર થશે. ટ્વિટર પર તમે જે લખો છો તે ગામ આખું સાંભળતું હોય છે. ભાષા પર કાબૂ રાખો. મર્દાનગી બતાવવાના બીજા ઘણા માર્ગ છે, ટ્વિટર પર એલફેલ બોલીને મા-બાપે આપેલા સંસ્કારો લજવશો નહીં. અહીં મને કોણ ઓળખવાનું છે, મેં તો મારું નામ પણ છુપાવ્યુંછે, સાચો પરિચય પણ નથી આપ્યો, ફોટો પણ ગલત ચિપકાવ્યો છે એવું માનીને તમે તમારા કુટુંબ પાસેથી મળેલા શાલીનતાના પાઠ ભૂલી જશો તો છેવટે નુકસાન તમારું જ છે. તમારી ગંદકીથી તમે જ ખરડાશો. સામેવાળો તો તમને બ્લૉક કરીને હાથ ધોઈ નાખશે. પછી તમારા એ ટ્વીટની બદબૂ તમારે આજીવન સહન કરવાની રહેશે.

૧૫. જતાં પહેલાં  છેલ્લી વાત સાંભળતા જાઓ. ટ્વિટર પર તમે જેને ચાહો છો એમના અકાઉન્ટ પર ગમે તે ઘડીએ પ્રતિબંધ આવી શકે છે. તમે ગમે એટલા ધમપછાડા કરશો તો પણ સમજવાનું એ છે કે ટ્વિટર એક ખાનગી માલિકીનો ધંધો છે, તમારા પિતાશ્રીની જાગીર નથી. ટ્વિટર, ફેસબુક અને   યુટ્યુબે અમેરિકાના પ્રમુખ ડોનાલ્ડ ટ્રમ્પ સત્તા પર હતા ત્યારે એમને બૅન કર્યા હતા અને ભવિષ્યમાં (2024માં) તેઓ જો ચૂંટણી લડશે તો પણ અમે એમના પરનો પ્રતિબંધ નહીં હટાવીએ ત્યાં સુધીની બદમાશી આ સોશ્યલ મીડિયાના માલિકો ઓપનલી કરી શકે છે. તમે પોતે પણ ગમે ત્યારે  બ્લૉક થઈ શકો છો. તમને ગમતાં હેન્ડલ બ્લૉક થાય તો જરા ખાંખાખોળા કરશો તો જડી જશે કે કઈ નવી આઇડેન્ટિટી સાથે તેઓ પાછા રણમેદાનમાં આવ્યા છે. ટ્રુ ઇન્ડોલોજિથી માંડીને અજિત ભારતી સુધીના અનેક અકાઉન્ટ્સના જન્મ-પુનર્જન્મ થયા છે. તમારે આ લખચોરાશીની લપ્પનછપ્પનમાં ન પડવું  હોય તો સાવધ રહેજો, જવાબદારીથી વર્તજો અને ટ્વીટ ટાઇપ કર્યા પછી બેવાર વાંચી જજો. કમ સે કમ જોડણીની ભૂલો તો સુધરશે જ.

પાન બનાર્સવાલા

તું જે વાવે છે તે લણે છે.  
જો પેલાં ખેતરો!  
થોર એ થોર અને  
ધાન્ય એ ધાન્ય છે.  

— રોબર્ટ બ્રાઉનિંગ

આટલું વાંચ્યું છે તો બે મિનિટ રોકાઈને થોડું વધુ વાંચી લો.

‘ન્યુઝપ્રેમી’ને આર્થિક સપોર્ટ આપો : સૌરભ શાહ

પ્રિય વાચક,

તમે જાણો છો એમ ‘ન્યુઝપ્રેમી’ કોઈપણ જાતના કૉર્પોરેટ ફન્ડિંગ વિના કે જાહેરખબરોની આવક વિના ચાલતું કોઈનીય સાડીબારી ન રાખતું એક વિશ્વસનીય ડિજિટલ મિડિયા છે.

‘ન્યુઝપ્રેમી’ની તમામ વાચનસામગ્રી સૌ કોઈ માટે ઓપન છે, વિના મુલ્યે ઉપલબ્ધ છે.

વધુ ને વધુ વાચકો સમજી રહ્યા છે કે મિડિયાની વિશ્વસનીયતા સામે પ્રશ્નો ઊભા થતા જાય છે એટલે કાણાને કાણો કહેવાની હિંમત રાખનારા અને સજ્જનોનો તથા રાષ્ટ્રપ્રેમીઓનો નિર્ભીક બનીને પક્ષ લેનારા ‘ન્યુઝપ્રેમી’ જેવા સ્વતંત્ર પ્લેટફૉર્મની આજે સખત જરૂર છે.

કોઈ પણ સારી પ્રવૃત્તિ ટકાવી રાખવી હોય અને એને ફેલાવવી હોય તો એ માટે બે મુખ્ય બાબતોની ખાસ આવશ્યકતા હોવાની. પરસેવો અને પૈસો. ‘ન્યુઝપ્રેમી’ને હજારો વાચકોમાંથી લાખો અને લાખોમાંથી કરોડો સુધી લઈ જવાની મહેનત વન પેન આર્મી એવા પત્રકાર સૌરભ શાહ દ્વારા થઈ રહી છે. પૈસાની અપેક્ષા તમારે પૂરી કરવાની છે.

તમારા સપોર્ટની આશાએ ‘ન્યુઝપ્રેમી’ના દરેક આર્ટિકલમાં જાહેરખબરોની જગ્યાએ અપીલની સૂચના/લિન્ક મૂકાય છે.

‘ન્યુઝપ્રેમી’ તમારા સ્વૈચ્છિક આર્થિક સપોર્ટથી અડીખમ રહી શકશે, વધુ વાચકો સુધી પહોંચી શકશે અને નિયમિત ધોરણે સમૃદ્ધ વાચનસામગ્રી ક્રિયેટ કરી શકશે. તમારામાંના દરેકે દરેક વાચકનો સ્વૈચ્છિક સહયોગ મળે તે આવકાર્ય છે. તમારા તરફથી મળનારી કોઈ પણ નાની કે મોટી રકમ ‘ન્યુઝપ્રેમી’ માટે ખૂબ ઉપયોગી થવાની છે.

દર એક-બે અઠવાડિયે કે મહિને-બે મહિને મળતો તમારો નિયમિત પ્રતિસાદ ‘ન્યુઝપ્રેમી’ની ઇમ્યુનિટી વધારશે અને ઝંઝાવાતો સામે ટકી રહેવાની ક્ષમતામાં ઉમેરો કરશે.

‘ન્યુઝપ્રેમી’ને તમે બેન્ક ટ્રાન્સફર દ્વારા કે પછી પેટીએમ, ગુગલ પે કે યુપીcomઆઈ ટ્રાન્સફર દ્વારા રકમ મોકલીને સ્ક્રીન શૉટ 9004099112 પર વૉટ્સએપ કરો અથવા HiSaurabhShah@gmail.com પર મેઇલ કરો.

‘ન્યુઝપ્રેમી’ને ઑલરેડી સપોર્ટ કરી રહેલા વાચકોનો હ્રદયપૂર્વક આભાર અને સૌ કોઈ માટે સદભાવ તથા શુભેચ્છાઓ.

‘ન્યુઝપ્રેમી’ વિશે વધુ જાણવાની ઇચ્છા થાય તો આ લિન્ક ક્લિક કરો : https://www.newspremi.com/gujarati/support-newspremi/