અમેઠી અને જગન રેડ્ડી

ગુડ મોર્નિંગ: સૌરભ શાહ

(newspremi.com, સોમવાર ૨૭ મે ૨૦૧૯)

આજે તમને બે વાત કરવાની છે. બેઉ પ્રેડિક્ટેબલ ઘટનાઓ છે. ઈન ફૅક્‌ટ એ બંને વિશે આ કૉલમમાં તમને અણસાર મળી પણ ચૂક્યો છે.

અમેઠીમાં સ્મૃતિ ઈરાની રાહુલ ગાંધીને પછાડીને વિક્રમ સર્જે છે એના બે જ દિવસમાં ચૂંટણીકાર્યમાં સ્મૃતિ ઈરાનીની સતત સાથે રહેનારા નિકટના જૂન સાથી સુરેન્દ્ર સિંહની હત્યા થાય છે. અમે તો એવી ભવિષ્યવાણી ભાખેલી કે નેક્‌સ્ટ ટર્મના પાંચ વર્ષ દરમ્યાન મોદી એવાં એવાં કામ કરશે જેને કારણે વિપક્ષો ભીંત સરસા જડાઈ જશે અને એ ફ્રસ્ટેશનમાં મરતા ક્યા નહીં કરતાના ન્યાયે તેઓ પાછલાં દોઢ-બે વર્ષમાં મરણિયા બનીને દેશ આખામાં અરાજકતા ફેલાવવા કોમી રમખાણો કરાવશે, સિવિલ વૉરની પરિસ્થિતિ ઊભી કરશે. આવું કહ્યું ત્યારે ખબર નહીં કે મોદી વડા પ્રધાનપદના સોગંદ લે એના પહેલાં જ અરાજકતા ફેલાવવાનું કામ શરૂ થઈ જશે. રાહુલ ગાંધીને હરાવીને સ્મૃતિ ઈરાની અમેઠીની લોકસભાની બેઠક જીતી શું ગયા, વિરોધીઓએ આતંક ફેલાવવાનું કામ શરૂ કરી દીધું. વિરોધીઓનો સંદેશ સ્પષ્ટ છેઃ ખબરદાર, અમેઠીવાસીઓ! ભૂલેચૂકેય જો તમે ભાજપનો કે એના નેતાઓનો-કાર્યકર્તાઓનો પક્ષ લીધો છે તો, સુરેન્દ્ર સિંહ તો હજુ શરૂઆત છે, હવે પછી તમારો વારો આવી શકે છે. વિપક્ષોની આવી અસહિષ્ણુતાની સામે પેલી ઈન્ટોલરન્સ ગૅન્ગ કેમ ચૂપ છે? મોદીના રાજમાં ડર લાગે છે એવું કહેવાવાળા મુસ્લિમ અભિનેતાઓ કેમ ચૂપ છે? અસહિષ્ણુતાના નામે છાપાંઓમાં હેડલાઈનો લૂંટનારી ટુકડે ટુકડે ગૅન્ગના પ્રેરણાદાતાઓને અમેઠીમાં થયેલી રાજકીય હત્યા દેખાતી નથી. ક્યાંથી દેખાય એમને તો બંગાળમાં સાતેય તબક્કાઓના મતદાન દરમ્યાન ક્રમશઃ વધતી જતી હિંસા પણ દેખાઈ નહોતી. ચૂંટણીપ્રચાર દરમ્યાન અને મતદાનના દિવસે પણ બંગાળમાં ભરપૂર હિંસા થઈ, ભાજપના સમર્થકોને ડરાવવા આગ લગાડવાના અનેક બનાવો બન્યા, ઠેકઠેકાણે પથ્થરમરો થયો. આવી એકાદ ઘટના પણ ગુજરાતમાં ચૂંટણીપ્રચાર કે મતદાન વખતે બની હોત તો? ગુજરાતમાં થતી એકાદ છૂટપૂટ હિંસાની ઘટનાને રાજકીય સ્વરૂપ આપીને દેશ આખામાં ગુજરાતને બદનામ કરતા સેક્‌યુલરો, વિપક્ષો અને છાપાં–ચેનલવાળાઓ બંગાળમાં ચૂંટણી વખતની હિંસાની ઘટનઓ વખતે શું કહેતા હતા ખબર છે? ‘આ વખતે દર વખત કરતાં બંગાળમાં ચૂંટણી સમયે ઘણી ઓછી હિંસા થઈ છે!’

બંગાળમાં છડેચોક મવાલીગીરી કરાવતી મમતાદીદીને પડખે રહેનારા મીડિયાના લાલભાઈઓને કેરળમાં આર.એસ.એસ., ભાજપ તથા હિન્દુવાદી કાર્યકર્તાઓને મારી નાખવાના ડઝનબંધ બનાવો વખતે સગવડિયું મૌન રાખવાનું ફાવી ગયું છે. આ જ ગૅન્ગ યુપીમાં કે અન્ય કોઈ ઠેકાણે ગૌમાંસના મુદ્દે લિન્ચિંગ થાય છે એવું કહીને કોઈ એકલદોકલ મુસલમાન સાથેની પર્સનલ અદાવતની ઘટનાને જબરું મોટું સ્વરૂપ આપી દે છે.

અમેઠીની ઘટના આગામી પાંચ વર્ષ દરમ્યાન વિપક્ષો શું શું કરી શકે છે, કઈ છેલ્લી પાયરી સુધી જઈ શકે છે, તેનું સૅમ્પલ છે. આવતી કાલે તમારામારા જેવા દેશભક્તોનો વારો પણ આવી શકે છે. આવું વિચારીને ડરવાનું નથી, છુપાઈ જવાનું નથી કે દહીંદૂધમાં પગ રાખવાનું કાયર પગલું પણ ભરવાનું નથી. આ લાલબત્તી ધરવાનું કારણ એક જ છેઃ માથે કફન બાંધીને લડતાં રહેવાનું, કમ્યુનિસ્ટ-કૉન્ગ્રેસી-સેક્યુલર પરિબળો સામે હિંમતભેર લડતાં રહેવાનું અને વખત આવ્યે આવી ઘટનાનું કાવતરું કરનારાઓને ફાંસીને માંચડે પહોંચાડવાની પ્રતિજ્ઞા કરી એ દિશામાં તન,મન,ધનથી કામ કરવું. સ્મૃતિ ઈરાનીએ પહેલ કરી દીધી છે. સુરેન્દ્ર સિંહની સ્મશાનયાત્રામાં નનામીને ખભો આપીને સ્મૃતિ ઈરાની છેક સુધી ચાલ્યાં એટલું જ નહીં સુરેન્દ્ર સિંહના પરિવારને, એમનાં બાળકોને તમામ પ્રકારની મદદ આપવાની બાંહેધરી આપી અને સુરેન્દ્ર સિંહના ખૂનીઓને ફાંસીના માંચડે પહોંચાડવાની કસમ પણ ખાધી. શેરની આને કહેવાય.

બીજી વાત. તમને ખબર છે કે ક્‌વિન્ટ, સ્ક્રોલ, પ્રિન્ટ વગેરે જેવા સેક્યુલર કકળાટ કરનારા ઑનલાઈન માધ્યમો આ વખતે ચૂંટણી ડિકલેર થયા પછી શું કહેતા હતા? કહેતા હતા કે સાચી લોકશાહીમાં કોઈ એક પક્ષની બહુમતીથી સરકાર બને તે જોખમી છે, સરકાર તો ઘણાબધા પક્ષોએ મળીને બનાવવી જોઈએ. ઘડીભર તમને લાગે કે આવું કહેનારા રાજકીય પંડિતોની ડાગળી ચસ્કી તો નથી ગઈ ને. પણ પછી તમને એમનો ઍજન્ડા સમજાય કે ભાજપ સશક્ત સરકાર ન બનાવી શકે અને કૉન્ગ્રેસ વગેરે પક્ષો ભેગા મળીને સરકાર બનાવે એવું તેઓ ઈચ્છે છે. આવું બને તો દરેક નાનામોટા પક્ષ સરકારની નૈયા હાલકડોલક કરવાની ધમકી આપીને પોતાનો સ્વાર્થ સિધ્ધ કરી શકે. મહામોરચાની સરકાર કે ગઠબંધન સરકારની સામે ચેતવણી આપવાને બદલે અને સ્થિર સરકાર કે કામ કરતી સરકાર જોઈતી હશે તો કોઈ એક પક્ષને સંપૂર્ણ બહુમતી અપાવવી જોઈએ એવું કહેવાને બદલે આ લેફ્‌ટિસ્ટો દેશ મરો, પ્રજા મરો પણ ડાબેરીઓનું તરભાણું ભરોવાળી ફિલસૂફીનો પ્રચાર કરતા રહ્યા. વિપક્ષોની આ ખતરનાક ચાલનો પ્રચાર કરતા કેટલાય બદમાશ ઑનલાઈન મીડિયાઓ સામે આપણે લાલબત્તી ધરી જ છે.

અને ગઈ કાલે એ પણ પુરવાર થઈ ગયું કે ૩૦૩વાળી મજબૂત સરકારને બદલે ગઠબંધનના સહકાર વિના તૂટી પડે એવી, ૨૮૨ કરતાં ઓછી બેઠકો ધરાવતી સરકાર આવી હોત તો શું થાત. આંધ્ર પ્રદેશના મુખ્ય પ્રધાન જગન રેડ્ડીએ દિલ્હીમાં પીએમ મોદીની મુલાકાત લીધા બાદ તરત જ નિવેદન આપ્યુંઃ ‘ ભાજપને ૨૫૦ જેટલી બેઠકો મળી હોત તો અમે એમને ટેકો આપ્યો હોત પણ એ પહેલાં આંધ્રને સ્પેશ્યલ કેટેગરી સ્ટેટસ આપવાના ડૉક્યુમેન્ટ્‌સ પર સહી કરાવી લીધી હોત.’

સી.એમ. જગન રેડ્ડીને અફસોસ છે કે ભાજપને સ્પષ્ટ બહુમત આપતી બેઠકો કેમ મળી. આને કારણે ભાજપને સપોર્ટ કરવાના બહાને વડા પ્રધાનનું કાંડુ આમળીને પોતાનું કામ કઢાવી લેવાની તક રોળાઈ ગઈ. આવો અફસોસ બીજા ઘણા પક્ષોને થતો હશે.

આંધ્રને સ્પેશ્યલ સ્ટેટસ આપવાની વાત નીકળી છે તો એટલું જાણી લો કે આંધ્રના ભાગલા પડ્યા, તેલંગાણા છૂટું પડ્યું ત્યારે આંધ્રને કેન્દ્ર સરકાર તરફથી ખૂબ બધા લાભ આપવામાં આવ્યા જ છે. કાં તો આ લાભ મળે કાં સ્પેશ્યલ સ્ટેટસ મળે. પણ આટલી સાદીસીધી વાત પ્રજા સુધી પહોંચાડવાને બદલે ‘આપણને અન્યાય થયો છે, અન્યાય થયો છે’ એવાં ભજન ગાઈને પોતાની ઈનઍફિશ્યન્સી છુપાવવા તેમ જ હજુ વધુ કરપ્શન કરવા માગતા આંધ્રના અગાઉના સી.એમ. ચંદ્રાબાબુ નાયડુએ તો મોદી સરકાર સાથેનો નાતો છોડીને અવિશ્વાસની દરખાસ્ત લાવવાનું તદ્દન નીંદનીય અને નિમ્નસ્તરનું કાવતરું કર્યું હતું. અને ચંદ્રાબાબુ નાયડુના રાજકીય વિરોધી જગન રેડ્ડીએ નાયડુનું મુખ્ય પ્રધાનપદ છીનવી લેવા માટે આંધ્રના મતદારોને વચન આપ્યું કે નાયડુ તમારા માટે જે નહીં કરી શક્યા તે હું કરી બતાવીશ, આંધ્રને સ્પેશ્યલ સ્ટેટસ અપાવીને જ જંપીશ. એમના કમનસીબે અને મોદી તથા આપણા સૌના સદ્‌નસીબે ભાજપને ૨૫૦ નહીં, ૩૦૩ બેઠકો સાથે ચોખ્ખી બહુમતી મળી. જગન રેડ્ડી જાય તેલ લેવા. હવે પછીના દિવસો દરમ્યાન આવા અનેક જગન રેડ્ડીઓ તેલ લેવા જશે અને એ સૌ મોદીને-ભાજપને-આ દેશને અસ્થિર કરવાના નવાનવા તરિકાઓ શોધ્યા કરશે.

આજનો વિચાર

પોતાનો એક પ્રવાહ હો, પોતાનું એક વહેણ હોઃ

જેમાં ન ખુદની હો ગતિ, મૃગજળ છે એ ઝરણ નહીં.

_‘મરીઝ’