ભાજપની ૩૦૩ અને એનડીએની ૩૫૩ સીટ્‌સ ક્યાંથી આવી

ગુડ મોર્નિંગ: સૌરભ શાહ
(શુક્રવાર, ૨૪ મે ૨૦૧૯)

ભાજપને ૩૦૩ બેઠકો મળે અને એન.ડી.એ. નો ટેલી ૩૫૩ સુધી પહોંચે એમાં કોઈ નવાઈ નથી. એક મહિના પહેલાં મેં આ આંકડા આપતી ભવિષ્યવાણી કરી હતી (જુઓ: ૨૫ એપ્રિલ ૨૦૧૯નું ગુડ મૉર્નિંગ અથવા સાંભળો ૨૧ એપ્રિલના રોજ કાંદિવલીમાં કરેલું પ્રવચન) તે સાચી પડે એ પણ કંઈ કોઈ ગ્રેટ વાત નથી. આ તો થવાનું જ હતું. આ જ થવાનું હતું. પણ આપણા સૌના મનમાં અવઢવ, અવિશ્વાસ અને આશંકાનાં બીજ રોપી દેવામાં આવ્યાં. કોના દ્વારા? વિપક્ષોએ ઊભી કરેલી ભ્રમણાઓના પ્રચાર દ્વારા. આ પ્રચાર મેઈન સ્ટ્રીમ મીડિયાએ આપણા સુધી પહોંચાડ્યો. ટીવીની ન્યુઝ ચેનલો, અખબારો તથા ડિજિટલ મીડિયા પર કાળો કેર વર્તાવતી ધ ક્‌વિન્ટ, ધ વાયર, સ્ક્રોલ વગેરે જેવી એક જમાનામાં મેઈન સ્ટ્રીમ મીડિયા સાથે સંકળાયેલી વ્યક્તિઓ દ્વારા શરૂ કરવામાં આવેલી ન્યૂસન્સ વેલ્યુ ઊભી કરી રહેલી ચેનલો દ્વારા. મેઈન સ્ટ્રીમ મીડિયામાંથી ફેંકાઈ ગયેલા વિનોદ દુઆ સરીખા બદમાશ પત્રકારોની કેટલીક યુ ટ્યુબ ચેનલોએ પણ એમાં ભાગ ભજવ્યો. હા, પુણ્ય પ્રસૂન વાજપેયી જેવા લેભાગુ પત્રકારો પણ એમાં ખરા.

આ સૌએ મળીને આપણી આંખ સામે પડદો રચ્યો. મોદી નિષ્ફળ છે, મોદીને રાજ કરતાં આવડતું નથી, મોદી કોમવાદી છે, મોદી વિદેશોમાં ફરીને જલસા કર્યા કરે છે. મોદીએ દેશની આર્થિક બરબાદી કરી છે.

કૉન્ગ્રેસ, તૃણમૂલ અને આપ સહિતના વિપક્ષોના વહેંતિયા નેતાઓએ જે નરેટિવ ઊભું કર્યું હતું તેમાં મીઠું – મરચું ઊમેરીને મેઈન સ્ટ્રીમ મીડિયા આપણા સુધી પહોંચાડતું રહ્યું. હકીકતો અને તથ્યોને ઢાંકી દેવામાં આ મીડિયા કેટલેક અંશે સફળ બન્યું કારણ કે ભલભલા મોદી-સમર્થકો એ સમયે પૂછતા થઈ ગયા હતાઃ આ વખતે મોદી આવશે?
અને હું કહેતો રહ્યો કે આવશે એટલું જ નહીં, ૨૮૨માંથી એક પણ બેઠક ઓછી નહીં થાય એટલું જ નહીં, ૩૦૦ પ્લસ આવશે, એન.ડી.એ.ને ૩૫૦થી ૩૭૫ વચ્ચેની બેઠકો મળશે. ટુ થર્ડ મેજોરિટી આપતી (૩૬૩) બેઠકો મળશે એવી મારી આગાહી જોકે સાચી નથી પડી, દસેક ઓછી આવી છે. પણ વખત આવ્યે કોઈ એવું બિલ પાસ કરાવવાની નોબત આવશે ત્યારે એટલા સંસદસભ્યોનો સાથ તો મોદીને મળી જ રહેવાનો.

મોદીની (કે ભાજપની કે એનડીએની) આ જીત છેલ્લા બેએક મહિનાના આકરા ચૂંટણી પ્રચારને આભારી નથી. આ જીત પુલવામા કે બાલાકોટને આભારી પણ નથી. આ જીત કેજરીવાલ-રાહુલની બેવકૂફીઓ, માયાવતી-મમતાની બદમાશીઓ કે વિપક્ષના અન્ય નેતાઓની બેદરકારીઓને પણ આભારી નથી.

આ જીત મોદીએ અને એમની સરકારે છેલા ૩૬૫ ગુણ્યા પાંચ એટલે કે વીતેલા ૧,૮૦૦ કરતાં વધુ દિવસો દરમ્યાન ચોવીસે કલાક જે કામ કર્યું છે તેનો નતીજો છે. આ કામ ન થયું હોત તો અમિત શાહે નિષ્ઠાપૂર્વક જે કંઈ ચૂંટણી સ્ટ્રેટેજીઓ ઘડી તેનો કોઈ મતલબ ન સર્યો હોત. આ કામ ન થયું હોત તો ભાજપ અને રાષ્ટ્રીય સ્વયંસેવક સંઘના લાખો, બલ્કે કરોડો કાર્યકરોએ ભારતના ખૂણે-ખૂણે પહોંચીને જે પરસેવો પાડ્યો તે ઊગી નીકળ્યો ન હોત. આ કામ ન થયું હોત તો તમારામારા જેવા કરોડો સામાન્યજનો હોંશે હોંશે મોદીને મત આપવા દોડી ન ગયા હોત.

મોદીમાં કામ કરવાની દાનત છે, નિષ્ઠા છે અને ગજબની આવડત પણ છે. એમને નિર્ણયો લેતાં આવડે છે. બહાદુરીભર્યા નિર્ણયો લેવાની કુશળતા એમનામાં છે. નોટબંધી, જીએસટી, ઊડીની સર્જિકલ સ્ટ્રાઈક, બાલાકોટની એર સ્ટ્રાઈક ઉપરાંત પાકિસ્તાન-રશિયા-સાઉદી અરેબિયા અંગેના નિર્ણયો લેવામાં કે પછી ઘર આંગણે કોનો સાથ લેવો તથા કોને પડતા મૂકવાનો નિર્ણય લેવામાં હિંમત જોઈએ. હ્યદયમાં સચ્ચાઈ હોય તો જ આવો નિર્ણય લેવાની, એને કોઈ પણ ભોગે અમલમાં મૂકવાની તાકાત આવે.

૨૦૧૪ની છવ્વીસમી મે નો સોગંદવિધિ દિવસ પછી આજદિન દરમ્યાન જે મોદીને આપણે જોયા છે તે મોદી જગત આખા માટે અને આવનારી અનેક પેઢીઓ માટે જંગી ઈન્સ્પિરેશન આપનારા એક બેમિસાલ યુગપુરુષસમા છે. આ પાંચ વર્ષમાં મોદીએ જે કંઈ કર્યું તેની સફળતા પાછળ એમનો ૧૪ વર્ષનો ગુજરાતના સી.એમ. તરીકેનો અનુભવ બોલે છે. ગુજરાતના એ અનુભવો દરમ્યાન મોદીમાં રહેલી મક્કમતા, એમની ક્ષમતા બહાર આવી અને આપણા સુધી પહોંચી. પણ એ મક્કમતા-ક્ષમતા કંઈ સી.એમ. બન્યા પછી મોદીમાં નથી પ્રગટ્યાં. ૧૭ સપ્ટેમ્બર ૧૯૫૦માં એમનો જન્મ. આયુષ્યના પાંચ-પાંચ દાયકાની તપસ્યાએ એમનામાં આ મક્કમતા-ક્ષમતાને ઠાંસીઠાંસીને ભરી જેનો લાભ ગુજરાતની જનતાને ૨૦૦૧માં તેઓ સીએમ બન્યાં તે પછી ૧૪ વર્ષ સુધી મળતો રહ્યો, જેનો લાભ છેલ્લાં પાંચ વર્ષથી આખા દેશને મળતો રહ્યો છે, જેનો લાભ, આપણે સતર્ક હોઈશું, આપણે સૌ જો મેઈન સ્ટ્રીમ મીડિયાના ભ્રમણાપટલને ભેદીને મોદીને તથા એમના કામને જોવાની ટેવ ચાલુ રાખીશું તો આવતાં બીજાં પાંચ વર્ષ સુધી, બીજાં દસ વર્ષ સુધી, બીજાં પંદર-વીસ-પચ્ચીસ વર્ષ સુધી મળતો રહેવાનો છે. અને મોદી શતાયુના આરે પહોંચીને નિવૃત્તિ માણતા હશે ત્યારે ભારતમાં બીજા મોદીઓ તૈયાર થઈ ગયા હશે. હવે તમને પેલા સૂત્રોચ્ચારનો અર્થ સમજાય છેઃ હર હર મોદી, ઘર ઘર મોદી!

વધુ કાલે.

આજનો વિચાર

મારા સમયની ક્ષણ ક્ષણ અને મારા શરીરની કણ કણ આ દેશ માટે છે.
_વડાપ્રધાન નરેન્દ્ર મોદી