2024ની ચૂંટણીમાં ત્રીજું વિઘ્ન કયું? : સૌરભ શાહ

( ગુડ મૉર્નિંગ, ‘ન્યુઝપ્રેમી ડૉટ કૉમ’ : શુક્રવાર, 4 ઑગસ્ટ 2023)

વિપક્ષો અને વિદેશી તાકાતો ઉપરાંત 2024ની ચૂંટણીમાં જે ત્રીજું મસમોટું વિઘ્ન છે તે કેટેગરી ઘરના ઘાતકીઓની છે.

એક જમાનામાં આપણને સૌને (અને ભાજપને તેમ જ એન.ડી.એ.ની સરકારને પણ) આલા દરજ્જાના પત્રકાર અરુણ શૌરીસાહેબ માટે અપાર પ્રેમ હતો. પણ વખત જતાં, કોઈક અગમ્ય કારણસર, શૌરી મોદી સરકારની ખિલાફ થઈ ગયા. એટલું જ નહીં એન.ડી.ટી.વી. વગેરેને ઇન્ટરવ્યુ આપીને મોદીસરકાર વિરુદ્ધ જેમતેમ બોલતા થઈ ગયા.

વાજપેયીની સરકારમાં નાણામંત્રી અને પછીથી વિદેશમંત્રી જેવા જવાબદારીભર્યા હોદ્દાઓ ભોગવી ચૂકેલા યશવંત સિન્હાએ પણ અરુણ શૌરી સાથે હાથ મિલાવ્યા એટલું જ નહીં શૌરીસાહેબ કરતાં એક ડગલું આગળ વધીને તેઓ મમતા બેનર્જીના તૃણમૂલ કૉન્ગ્રેસ પક્ષમાં ઘૂસીને એક વર્ષ (2021-2022 ) માટે પક્ષના વાઇસ પ્રેસિડન્ટ પણ બની આવ્યા. સિન્હાસાહેબને રાષ્ટ્રપતિ બનવાના હેવાં હતાં. સમગ્ર વિપક્ષના ઉમેદવાર તરીકે આ સાહેબ આદરણીય દ્રૌપદી મુર્મુ સામે ચૂંટણી લડ્યા અને અત્યંત બૂરી રીતે ભોંય પર પટકાયા.

બીજા એક ફિલ્મી સિન્હા પણ વાજપેયી સરકારમાં આરોગ્યપ્રધાન તથા વહાણવટા ખાતાના પ્રધાન રહી ચૂક્યા હતા પણ એમના બિનભરોસાપાત્ર વ્યક્તિત્વને કારણે ભાજપે એમને તડકે મૂકી દીધા ત્યારથી એમની શૉટગન મોદીસરકાર તરફ હવાઈ ગયેલો દારૂગોળો ફોડવાની કોશિશ કરતી રહી. અભિનેતા તરીકે લાજવાબ શત્રુઘ્ન સિન્હાને એમ કે મોદીજીને જેટલી વધુ ગાળાગાળ કરીશું એટલા તેઓ વધુ ઉશ્કેરાશે, મને ભાજપમાંથી કાઢી મૂકવામાં આવશે અને હું શહીદ બનીને ભાજપના વિલનમાંથી વિપક્ષોનો હીરો બની જઈશ. પણ શત્રુજીના નસીબ એમના દારૂગોળાની જેમ ફૂટેલાં હતાં. તેઓશ્રીને ભાજપે પક્ષમાં જ રહેવા દીધા. એમની ટર્મ પૂરી થઈ ત્યાં સુધી રહેવા દીધા. નવી ટર્મ માટે ટિકિટ ન મળી એટલે શત્રુજી પણ મમતા બેનર્જીની ગૅન્ગમાં જોડાઈ ગયા.

સુબ્રહ્મણ્યમ સ્વામીએ 1975ની ઇમરજન્સી દરમિયાન જે નેત્રદીપક કામગીરી કરી તેના રેકગ્નિશને આ અતિ બુદ્ધિશાળી તથા ચતુર રાજકારણીના દિમાગમાં દોઢ કિલો રાઈ ઠાંસી દીધી. 1980 પછીની એમની તકવાદી રાજકારણી તરીકેની કારકિર્દી બાવજૂદ ભાજપે એમને સ્વીકાર્યા પણ સ્વામીએ પોતાનો સ્વભાવ બદલ્યો નહીં. ભાજપ તથા સરકાર દ્વારા થતી સારી કામગીરીઓનો ખોટેખોટો જશ લઈને તેઓ પોતાના ટેકેદારોને ભરમાવતા રહ્યા એટલું જ નહીં મોદી સરકારમાં બધા બેવકૂફો જ ભર્યા છે અને એક પોતે જ ડહાપણના ભંડાર છે એવી હવા ફેલાવીને તેઓ સમજદાર લોકોમાં સુસુ સ્વામી તરીકે ઓળખાવા લાગ્યા. ભાજપે એમને પણ સાંખી શકાય ત્યાં સુધી સાંખ્યા. રાજ્યસભાની મુદત પૂરી થતાં જ એમને પડતા મૂક્યા. સ્વામી પણ શત્રુની જેમ ખ્વાબ જોતા હતા કે મને પક્ષમાંથી કાઢી મૂકો જેથી હું શહીદીનો બિલ્લો પહેરીને હીરો બની જાઉં. મોદીએ સ્વામીને હીરો બનવાની તક આપી નહીં. આજકાલ તેઓ દરેક વિપક્ષની દાઢીમાં હાથ નાખીને રાજ્યસભામાં પાછા ફરવાની પેરવીમાં છે.

જેઓની પૂંછડી ભોંયમાં દાટ્યા પછી પણ વાંકી ને વાંકી રહેતી હોય તેઓ વખત જતાં ન ઘરના રહેતા હોય છે ન ઘાટના એવું આપણે અનેકવાર વિટનેસ કરી ચૂક્યા છીએ.

રાષ્ટ્રીય કક્ષાએ અવળચંડા દિગ્ગજ નેતાઓની જે હાલત થઈ તેવી જ પરિસ્થિતિ સ્થાનિક કક્ષાએ ગુજરાતમાં શંકરસિંહ વાઘેલા અને ગોરધન ઝડફિયા જેવા તેજસ્વી પણ પક્ષ-પ્રજા માટેની વફાદારીમાં ઊણા ઉતરેલા અનેક નેતાઓની થઈ. એક જમાનામાં વિશ્વ હિન્દુ પરિષદના ગજાદાર નેતા તરીકે ઓળખાતા ડૉ. પ્રવીણ તોગડિયા પણ આ જ રસ્તે ચાલ્યા અને ભૂલાઈ ગયા તે ઘણા મોટા અફસોસ ની વાત છે.

આ તો બૅકગ્રાઉન્ડર હતું. એ બધું ભૂલી જાઓ. આજની વાત કરીએ.

2014ની 26 મેએ નરેન્દ્ર દામોદરદાસ મોદીએ દેશના 14મા વડાપ્રધાન તરીકે સોગંદ લીધા તે જ ઘડીએ ઇંડાનું કોચલું ફોડીને બહાર આવેલા અનેક હિન્દુવાદીઓ આજે કહેવા લાગ્યા છે કે 2024માં મોદી નહીં જોઈએ. કેટલાક કહે છે કે ભાજપ નહીં જોઈએ- મોદી ચાલશે. કેટલાક કહે છે કે મોદી-ભાજપ ચાલશે પણ આર.એસ.એસ. નહીં જોઈએ. કેટલાક કહે છે કે મોદીને હટાવો, યોગીને લાવો. કેટલાક કહે છે કે આ બધાને હટાવો, એક નવો હિન્દુવાદી પક્ષ બનાવીએ- આવું કહેનારાઓ એક વૉટ્સઍપ ગ્રુપ પણ સરખી રીતે ચલાવી શકતા નથી. એમના વૉટ્સઍપ ગ્રુપના સભ્યોમાં અડધો ડઝન તો ઍડમિન બનવા માટે આપસમાં ઝઘડો કરી રહ્યા હોય છે અને આ છએયને પાછો વહેમ હોય છે કે અમારા વૉટ્સઍપ ગ્રુપને જ્યારે દિલ્હી પર રાજ કરવા મળશે ત્યારે વડા પ્રધાન તો હું જ બનીશ.

2014 પહેલાં આ હિન્દુવાદીઓ કાં તો સેક્યુલરવાળાઓના ખેમામાં હતા, કાં પછી વાડ પર ઉભડક બેઠેલા ડબલ ઢોલકી જેવા હતા. નવો મુસલમાન પાંચવાર નમાજ પઢે અને નવો વૈષ્ણવ આઠેય સમાનાં દર્શન કરવા જાય એવા આ નવાનવા હાઈપરડાઓ પોતાની જાતને મોદી, શાહ, ભાગવત કરતાં વધારે મોટા સનાતનવાદી અને ભાજપ-સંઘ કરતાં મોટા હિન્દુવાદી પુરવાર કરવા માટે બેતાબ બની ગયા છે. તેઓ વારતહેવારે મોદીમાં આ અક્કલ નથી ને ભાગવત તો મુસ્લિમપ્રેમી છે એવું માનતા થયા છે, છડેચોક બોલતા પણ થયા છે. ભાજપ અને સંઘ તો હિન્દુત્વ માટે જોખમી છે એવું કહેવા લાગ્યા છે.

આવું કહેવા પાછળનાં એમનાં કારણો શું હોઈ શકે? નાદાની હોઈ શકે. ટૂંકી દૃષ્ટિ હોઈ શકે. અણસમજ કે ઓછી સમજ હોઈ શકે. બીજા ભોળા હિન્દુઓ પોતાના પ્રત્યે આકર્ષાય એવી સ્ટ્રેટેજી હોઈ શકે. ભાજપ સરકાર તરફથી પોતાને જે જોઈતું હતું તે નથી મળવાનું એવો અહેસાસ પણ હોઈ શકે. આ સિવાયનાં પણ કારણો હોઈ શકે.

2024માં મોદી-ભાજપને હટાવીને દેશમાં ‘સાચું હિન્દુત્વ‘ લાવવાનું ખ્વાબ જોતા હિન્દુ શેખચલ્લીઓ આજકાલ પૂરજોશમાં પોતાની સ્ટેરોઈડવાળી તાકાતનો પરચો બતાવી રહ્યા છે. બંગાળમાં હિન્દુઓની કતલ થાય છે ત્યારે તેઓ સી.એમ. મમતા બેનર્જીનો કાન પકડવાને બદલે મોદીનો કૉલર ઝાલીને પૂછતા હોય છે કે કેન્દ્ર સરકાર શું કરે છે?

કૉન્ગ્રેસશાસિત રાજસ્થાનમાં ઈંટના ભઠ્ઠામાંથી બળાત્કારપીડિત સગીર બાળાના મૃતદેહના અંશ મળી આવે છે ત્યારે આ હાઈપરડાઓ ચૂપ રહે છે પણ હરિયાણા-મણિપુરની હિંસામાં તે રાજ્યના ભાજપી મુખ્યમંત્રીઓને ધોકો લઈને ધોઈ નાખે છે. સેક્યુલરો આવું કરે તે તો સમજી શકાય. પણ આ તો પોતાને હિન્દુવાદી ગણાવતા હાઈપરડાઓ છે. કેટલાક લોકો એમને રાઈટ વિંગને બદલે રાયતા વિંગના સભ્યો તરીકે ઓળખાવે છે- જ્યાં ને ત્યાં જઈને જઈને ખોટા મુદ્દાઓ ઉપાડીને હો હા કરીને રાયતું ફેલાવનારાઓ એટલે રાયતા વિંગના સભ્યો.

જયપુર ડાયલોગ્સવાળા સંજય દીક્ષિતે શરૂઆત એક પ્યોર હિન્દુવાદી તરીકે કરી. ક્રમશઃ એમની ખરી ઓળખાણ ઉઘાડી પડતી ગઈ. આજે હવે તેઓ વાડ પર બેસીને બેઉ તરફ ઠેકડા મારે છે.

એવું જ આનંદ રંગનાથનનું છે. ટીવીની ડિબેટ્સમાં ચપડચપડ અંગ્રેજી બોલીને હિન્દુઓ તરફી અફલાતૂન દલીલો કરીને લોકપ્રિય બનેલા જે.એન.યુ. (જવાહરલાલ નહેરુ યુનિવર્સિટી)ના પ્રાધ્યાપક હવે લાગ મળે ત્યારે તટસ્થ દેખાવાના બહાને મોદી, ભાજપ, સંઘને બે લપડાક મારતા જાય છે.

‘માનુષી‘ના તંત્રી મધુ કિશ્વાર અગાઉ મોદીવિરોધી હતાં. પછી મોદીના વખાણ કરતાં થયાં. પણ મોદી તરફથી રાજ્યસભાની સીટ કે બીજું કશું પણ ન મળતાં મધુ આન્ટી હવે ફરી મોદીવિરોધી બની ગયાં છે. એમને પણ, કેટલાક લોકો ‘તટસ્થ‘ તથા ‘નિરપેક્ષ‘ ગણતા- જ્યારે તેઓ યુ ટર્ન માર્યા પછી, મોદીતરફીમાંથી મોદીવિરોધી બનેલાં. પણ છેવટે એમની અંદરનું અસલી વિચારતત્વ બહાર આવ્યું. આ તમામ લોકોના વૈચારિક ડીએનએ એકસરખા હોય છે.

આજકાલ સંદીપ દેવ કરીને એક માયા છે તે બહુ ગાજ્યા કરે છે. તેઓ SMaRT નામનું એક ગતકડું ચલાવે છે જેમાં એમણે અને એમના મિત્રોએ થોડું સારું કામ કરીને મારા જેવાનાં પણ દિલ જીતી લીધાં. પછી જ્યારે મારી ડહાપણની દાઢ ફૂટી અને હું એ લોકોને સવાલ કરતો થયો એટલે તેઓએ ફૂટ કહીને મને ફૂટાડી દીધો. આજકાલ આ SMaRT લોકોએ ‘એકમ સનાતન દળ‘ના નામે ઝુંબેશ શરૂ કરી દીધી છે કે અમે જ સાચા હિન્દુવાદી છીએ અને ભારતના હિન્દુઓના અમે જ સાચા તારણહાર છીએ. આ મસીહાઓ મોદી-ભાજપ-સંઘ જેવા નકામા લોકો-સંગઠનોથી તમને અને સમગ્ર દેશને બચાવી લેવા માગે છે. તેઓ કહેતા ફરે છે કે 2024માં અમે વડા પ્રધાન બનીને આમ કરીશું ને તેમ કરીશું.

અમે પણ અમારા મિત્રોને કહેતા હતા કે કૅટરીના કેફને પરણીને અમને જે દીકરો થશે એના ઍડમિશન માટે અમે કઈ સ્કૂલમાં ફી ભરી દીધી છે.

• • •

તાજા કલમ: તમને આમાં મઝા પડી રહી છે? તો કમેન્ટ બોક્સમાં તમારી લાગણી કેમ નથી લખતા! તમારા હોંકારા વગર અંધારામાં તીર ચલાવવા જેવું લાગે છે!
—સૌ.શા.

• • •
ન્યુઝપ્રેમીને આર્થિક સપોર્ટ આપવા અહીં ક્લિક કરો